Гэхдээ чухал эсэхийг та үнэлэхгүй, энэ бол мэргэжлийн редакцуудын ажил бөгөөд тэд өдөр тутам нийгмийн мэдээллийн урсгалыг залуурдаж байдгийн хувьд өөрсдийн гэсэн үнэлэлтийг ядах зүйлгүй өгнө. Энэ нь хэдийгээр гажуудсан мэт, хэвлэл, мэдээллийн хэрэгслүүдэд хэтэртхий их эрх мэдэл, мэдээллийг гажуудуулж болох боломж олгож буй мэт санагдаж болох ч эцсийн эцэст редакц л мэдээллэх эсэх шийдвэрийг гаргах болно.

Иймд, та чухам яагаад хэвлэлийн бага хурал зохион байгуулах гэж байгаа вэ, үнэхээр сэтгүүлчдийн сонирхлыг татах, олон нийтэд түгээх ёстой мэдээлэл мөн үү, хэвлэлийн бага хурал зохион байгуулснаар ямар үр дүнд хүрэх вэ, эсвэл өөр байдлаар мэдээллээ түгээх үү, гэх мэт эргэцүүллийг хийж нарийн төлөвлөх шаардлагатай.

Редакцууд хором бүрт нийгмийн бүхий л хэсгээс шинэ, соргог мэдээлэл эрэлхийлж, тэдэнд мөн мэдээллээ нийлүүлэх сонирхолтой олон арван хүсэлттэй тулгарч, эцэст нь маш цөөнийг мэдээ болгож олон нийтэд хүргэдэг гэдгийг ямагт санах нь зөв билээ.

• Хэвлэлийн бага хурал зохион байгуулахаар шийдэх.

Энэ бол таны хувьд маш чухал алхам байх бөгөөд хэвлэлийн бага хурал зохион байгуулахаар шийдсэн бол ямар сэдвээр, юу ярих гэж байгаагаасаа шалтгаалан Улаанбаатар хотод хэвлэлийн бага хурал хийх боломжтой газар болон цагаа товлох хэрэгтэй. Монголын нөхцөлд сэтгүүлчид өдөрт доод тал нь 2-3 мэдээ бэлтгэх хэмжээний цаг завгүй явдаг тул өдөр, цагийг нарийн тооцох шаардлагатай.

• Хэвлэлийн бага хурал болох гэж буй талаар редакцуудад урьдчилсан мэдээлэл өгөхдөө хүргэх сувгаа зөв тодорхойлох хэрэгтэй бөгөөд мэдээллээ илгээж, харилцаа холбоо тогтоо.

Редакцууд таны мэдээлэлтэй танилцах бөгөөд нийгмийн ач холбогдлыг үнэлж, хэрэв сурвалжлахаар бол хэрхэн, ямар өнцгөөс, бичлэгийн ямар төрлөөр олон нийтэд хүргэх вэ зэргээ шийддэг. Өөрөөр хэлбэл, хэвлэлийн бага хурлаас өмнө таны өгсөн мэдээллийн ач холбогдлыг урьдчилан тооцоолсон байдаг тул хэвлэлийн бага хурын талаарх зарлалыг оновчтой бичих шаардлагатай. Товч бөгөөд тодорхой.

• Хэвлэлийн бага хурал зохион байгуулах

Хэдийгээр та хэвлэлийн бага хурлын үеэр бүх хүчээ шавхан ярьсан байлаа ч ярьсан зүйлийнхээ голыг олсон хэвлэлд зориулсан мэдээллийг урьдчилан бэлтгэсэн байх шаардлагатай. Хэвлэлд зориулсан мэдээлэл нь мэдээнд тавигдах ерөнхий шаардлага хангасан, дүрэм, стандарттай байдаг тул олон нийттэй харилцах ажилтанд хандах нь зөв. Энэ талаар хэвлэлд зориулсан мэдээлэл хэсгээс дэлгэрэнгүй унших боломжтой юм.

Харин хэвлэлийн бага хурлыг эхлээд та ярих, дараа нь тэд таниас асуух гэсэн үндсэн хоёр хэсэгт ангилдаг. Таны хэлсэн мэдээлэл ямар ч чухал байсан уламжлалт (сонин, телевиз гэх мэт хугацаа, зай талбайд баригддаг) хэвлэл, мэдээллийн хэрэгсэл таны хэлсэн үгсээс иш татан мэдээ бэлтгэдэг тул та камерны өмнө аль болох цөөн үгтэй өгүүлбэр сонгох хэлбэрээр яриагаа бэлдэх нь зөв. Хэрвээ гол мэдээллээ өгч дууслаа гэж үзэж байгаа бол үлдсэн цагт нь та сэтгүүлчидтэй илүү ойроос ярилцах, дэлгэрэнгүй тайлбарлаж өгөх замаар гол “мессеж”-ээ бататгахад, харилцаа холбоо тогтооход зарцуулах нь ашигтай юм.

Жишээ нь, та нэг асуудлын талаар 20 минут ярьсан ч, 2 цаг ярьсан ч ялгаагүй оройн мэдээнд таныг, эсвэл асуудлыг 2 минут, эсвэл сонины хэсэгхэн буланд дурдаад өнгөрөх нь бий. Энэ зай талбай их, багаас үл шалтгаалан ард нь учир холбогдол, үнэн зөв байх, тэнцвэртэй байх, баримтаар нотлох, төвийг сахих гэх мэт сэтгүүл зүйн маш олон үйл ажиллагаа өрнөсөн байдаг юм. Тиймээс танд оногдож болох хамгийн бага зай талбайг ч гэсэн үр ашигтай байлгахын тулд хэт их зүйл ярих хэрэггүй бөгөөд хамгийн чухлаа товч, тодорхой хэлж, үлдсэн цагт нь камерны ард зогсоод ярьсан мэдээллээ бататгахад, сэтгүүлчтэй харилцаа холбоо тогтооход зарцуулах нь үр өгөөжтэй.